Aínda que nos cataloguemos como
boas persoas, que, a maioría, penso que o somos, tamén é certo que a maldade
asoma por calquera mexericada, polo que se chega á conclusión de que somos
malos por natureza. Criticamos a eito e, o que é peor, somos malos
criticadores. Sempre nos queixamos das famosas cuadrillas que forman os que
mandan nos concellos cando están a piques de celebrarse unhas eleccións, e non
caemos na conta de que os criticadores tropezan na mesma pedra, e non por
contratar a moreas a xente que faga vulto para tal ou cal mester. Son os
propios políticos ou a propia xente dos partidos políticos os que se xuntan en
cuadrillas para percorrer os concellos na procura dos votos. Que diferenza hai
entre as dúas cuadrillas, a dos obreiros e a dos políticos? Tanto a unha como a
outra tan só se deixan ver en períodos electorais. Se nos rimos daqueles seis
ou sete (ou máis) que están para facer tan só un buraco, por exemplo, por que
non nos rimos deses catro ou cinco (ou máis) que andan de porta en porta para a
mesma obra: a poltrona da alcaldía. É igual; seguiremos tropezando, é dicir,
seguiremos criticando.
jueves, 30 de abril de 2015
martes, 28 de abril de 2015
ATACANDO, QUE É XERUNDIO
Atacar. Todo consiste en atacar.
E non falo nin de fútbol nin de baloncesto. Atacar con balas, con bombas, con
armas, con algo que faga dano, que mate. O caso é que mate. Aínda que sexan
inocentes. Estados Unidos ataca a calquera país porque si, porque se sente
poderoso e porque non quere que lle rosmen. Rusia ataca porque ataca Estados
Unidos. Agora a Unión Europea quere atacar os barcos das mafias en Libia. O das
mafias non está mal, pero, quéirase que non, sempre hai danos colaterais,
mortes inocentes. Para atacar precísase dun despregamento enorme, tanto de
homes como de máquinas, o que supón un gasto impresionante. Non sei canto, pero
meto a man no lume defendendo que con ese gasto os inmigrantes ilegais
deixarían de ser inmigrantes. Se ese gasto o empregasen en postos de traballo
en África, seguro que non habería que atacar ningún barco. Os espectadores,
xogadores e adestradores atacan ós árbitros. Os políticos atácanse uns a
outros; sen armas, pero deixan feridas que as pagamos todos. Máis danos colaterais.
Sinceramente, levamos a maldade dentro. Ataca, animal!
lunes, 27 de abril de 2015
O XERGÓN DA ESPERANZA
Déitate na almofada dos soños e
pensa que o ourizo cacheiro pica pero non mata. Déitate no ruxerruxe dunhas
sabas de flanela e xa verás cómo o pombo encrista á rula detrás dunha silveira.
Non todos os ollos das curuxas están abertos. Algúns mouchos viven a vida dos
soños, daqueles de irás e non volverás ou daqueles que nunca se converterán en
realidade. Sempre é máis fácil soñar co verme luceiro da aurora que coa rañadura
dun desconsolo. Déitate na sinxeleza dun lóstrego, dun alustre para que a treboada
marque o ritmo ou as liñas de todas as rectas sen infinito. Hai miradas que van
moito máis alá. Cando o escambrón che araña a roupa notas como o veleno dos
tempos navega polo teu sangue amorfo. Sempre houbo nugalláns e moito máis que
nugalláns. Os houbo que traballaron leiras sen sachos e escribiron libros sen
tinta. Ás veces o pensamento é suficiente para querer facer e non levar nada a
cabo. Déitate no xergón da esperanza e verás que todo ten o seu aquel. E
vivirás baixo a batuta dos soños.
viernes, 24 de abril de 2015
XUSTIZA PARA OS INDEFENSOS
Outra agresión máis sobre os
árbitros. E van?... Hai un días tocoulle ó que arbitrou o partido O Val –
Mugardos, onde o adestrador daquel agrediu ó xuíz da contenda, e non
chegándolle con este, botouse ademais a un dos seus asistentes. Aí atrás
aparecía nos xornais unha enquisa de que á semana realizábanse 36 ofensas
contra os árbitros e un era agredido cada 15 días. O das ofensas teñen que ser
moitísimas máis. Dicindo pan por pan, aseguro categoricamente que esas 36
ofensas lánzanselle en tan só un partido. Digo ben: en tan só un partido.
Imaxinade os partidos que hai, principalmente, durante as fins de semana.
Imaxinade os deportes que precisan de árbitros. Porque se intúe, porque o sei,
porque o vexo (no fútbol e no baloncesto, que é o que máis vexo e ó que máis
asisto) as ofensas caen coma chuzos sobre un (no fútbol) ou dous (no
baloncesto), sobre os seus asistentes e
incluso, por ofender, ata ofendemos ós da mesa (en baloncesto) cando tardan en
subir unha canastra ó marcador. Somos lobos rabiosos, doentes que lle rillamos
na conciencia a un ser humano que intenta facer o que sabe e o que lle deixan,
xa que moitos xogadores tan só se dedican a intentar enganalos. E sigo opinando
que, segundo se toman medidas drásticas contra a violencia de xénero, por que
non se fai o mesmo con eses salvaxes que andan soltos por campos de fútbol e
pavillóns deportivos? Por que nin as Federacións nin o Goberno actúan? Onde
está a xustiza para eses indefensos?
NON ADIVIÑARON A RETRANCA
Morriña e saudade ou señardade
son palabras galegas sobre as que non descubro nada, nin polo seu uso nin polo
seu significado. E neste lote, nesta partilla tamén podemos meter a retranca,
con permiso do nabo de Lugo e do sempiterno e internacional carallo, o patrón
de Galicia. Tanta retranca, tanta retranca para nada. Semella que os galegos
estamos entre os españois con menos alegría e peor animo. Manda truco! Quen o
ía dicir! Penso que na sondaxe, os enquisadores confundiron o touciño coa
velocidade, o bacallau coas verzas. Non sei, pero creo que na análise botarían
man desa morriña e desa saudade para chegar á conclusión de tristeiros,
apagados. Non foron capaces de adiviñar a retranca neses mesmos substantivos.
Simulamos que temos morriña e saudade para que... a eles que lles importa! Xa o
teño dito con respecto ás famosas subidas e baixadas (o galego non sabe se sobe
ou baixa) Sabemos, sabemos!; o que pasa é que non llo dicimos ós curiosos. Que
lles importa a nosa vida! Somos alegres e temos bo ánimo, pero non llo dicimos.
Sabinillos do carallo!
jueves, 23 de abril de 2015
O FOL DUNHA MOSCA
Uuiii, empeza a facer demasiado
aire. Ó lonxe xa se ven os lóstregos. Ó mellor non tarda en caer a treboada. Ó
mellor non descarga por aquí. A treboada vai por onde lle peta. Ou por onde a
leve o vento. Vai ti saber; igual anda alguén por aí soprando. Ó mellor igual é
o fol dunha mosca. Ós nenos, cando trona, dicímoslles que anda Deus a patadas
co demo. Dicimos cada cousa. E dicímosllas ós nenos, coma se foran inocentes.
Ás veces somos parvos de máis. Pensamos que un neno cae na trampa así como así.
“Como van andar a patadas se non se suxeitan no aire”. “Polo aire só anda o
Supermán”. Si oh, calquera engana a un neno. Volvamos á realidade; o aire
semella que calmou. Tamén se di que logo do aire chega a auga. Vai ti saber; ó
mellor todo sigue dependendo do fol dunha mosca ou das ás das bolboretas. Non
entendo nada de nada. É igual. Chégame con oír os tronos e ver os alustros. Os
tronos gústanme, os alustros xa non tanto; impoñen respecto... pola carga que
levan consigo. A miña nai ría a gargalladas cando oía tronar. É que a miña nai
era moi festeira.
Suscribirse a:
Entradas (Atom)