O
bicho quere penetrar, atravesar a conciencia dun soño, pero a loita dun
sentimento vai máis alá dunha guerra que se pensa que se ten perdida. Ninguén
quere perder unha guerra que non ten cuartel. O bicho quere furgar,
escaravellar polas corredoiras da esperanza. Pobre infeliz! Mal pensa el que os
desexos dunha mente feliz e libre van máis alá dunha batalla que se pensa que
está ganada. Todo presente ten o seu atranco. Para que todo o futuro os
esquive, os salte, os brinque, os evite. O bicho quere fundir os soños dunha
vida que circula polas estradas da memoria. Pero ninguén acouga sen escribir
catro versos nos que o bulebule dun corazón amosa dúas bágoas e tres sorrisos.
Meteremos os sorrisos nun ascensor para que suban ata o infinito e máis alá.
Destriparemos o bicho contra os penedos da nostalxia e despois, cada quen, que
baile ó son que queira. Algúns bailarán sobre o absurdo, sobre a incoherencia
dun recordo. Outros, simplemente, sobre a melancolía dun consolo.
miércoles, 30 de septiembre de 2015
martes, 29 de septiembre de 2015
UN GRAO POR ENRIBA DA MERDA
Heladio
Orixinario Sanmartín pensaba que estaba un grao por enriba da merda, pero non
era máis que calquera veciño de Partovia. Escribira tres libros sobre os
penedos que había detrás da súa casa e xa se cría un escritor profesional. No
primeiro libro describía o seu colorido (gris, por suposto) e entre que
analizaba a cor por cada punto cardinal, alá encheu as 60 páxinas das que
estaba composto o “memorando”. Coa súa publicación, Heladio Orixinario
Sanmartín empezou xa a comportarse de forma estraña. Algo así como “aquí estou
eu e os demais que se f…”. No segundo libro analizou a dureza dos mesmos
penedos. E fixo máis ou menos o mesmo que no primeiro: que cun pequeno pico
entrounos por aquí e por alá, e segundo as lascas que choutasen, os penedos
eran de tal ou cal consistencia. Publicoullo o concello de Partovia e na súa
presentación xa se viu vir a cousa: un grao por enriba da merda. Andaba por
todas as rúas como un militar: cabeza alta, vista ó fronte. No terceiro, a
análise versaba sobre os bichos existentes que en algún momento pousaban nos
penedos; desde o propio ser humano (vaia bicho!) ata a pulga máis raquítica. Este
tema deulle para 200 páxinas xustas. E da súa publicación xa non digo nada.
lunes, 28 de septiembre de 2015
UNHA DUCIA DE RAPACES
Calquera quería coller o niño de
azulenta ou paxara parda, pero ninguén lle chegaba. A súa situación non era moi
accesible e os rapaces non estaban moito para a faena. Eles conformábanse con
descubrilo e punto. Os rapaces eran cerca dunha ducia e cada un deles quería
vivir a súa aventura. Así, un deles pasaba do niño e andaba na procura de
lagartos. Outro quería que un sapoconcho ou tartaruga asomase pola beira
esquerda do río Arnoia. Algúns máis corrían detrás dunha pelota de tenis que
facía de balón de fútbol. As porterías eran catro toxeiras e os porteiros
adiantaban un paso por aquilo de se se tiñan que tirar a pola pelota. A inercia
dun porteiro é tirarse. Cando o sol empezaba a acochar por detrás do outeiro de
Brandín, xa todos estaban sentados planeando o día de mañá. O día de hoxe, para
eles, estaba a piques de rematar. As súas idades eran para estar ás nove na
cama, ou como máis tardar, ás dez. Romperon a roda e, amodiño, moi amodiño,
cada un colleu camiño da súa casa.
domingo, 27 de septiembre de 2015
LAGOAS QUE TAMÉN SECAN
Vai
o demo co rabo entre as pernas e un sapoconcho cabalga por entre os xuncos do
Río Vello. Colga o anzol da folla dun amieiro porque alguén engarrou alí os
recordos dun tempo negro. Non sempre a felicidade aboia nun barquiño de papel;
naqueles barquiños de papel que botabamos polas caldeiras dos lameiros dos
Lamas, alá pola ponte do Medo ou das Cabras. Quere o demo ir por entre as
cascas dun carballo, pero a flor do toxo brilla por entre os penedos de
Barricobos. Hai lagoas na mente humana que tamén secan; aínda que as treboadas
asomen todo o inverno. Cada quen que lance un suspiro e que todos os gatos
pardos miañen nas noites escuras de Baños de Molgas. Cada paso que leva á burga
é un recordo compartido. Ou non. Pero sigue sendo recordo. Vai un cego pola
carreira da Lama, tropeza e di: “é un atranco”. Pero sigue o seu camiño. Ata o
demo, ás veces, se atopa con obstáculos insalvables; polo que ten que meter o
rabo entre as pernas, rosmar e marchar. Algunhas veces o silencio amouca ó
ruído. Tan só Sabina describe ben o ruído.
viernes, 25 de septiembre de 2015
TERAPIAS PARA A ANSIEDADE
Eu
“paso” da ansiedade, pero estes días andei máis nervioso ca nunca. Porque non
podía escribir. Porque non mandaba ningún relato a este xornal. Sinceramente,
paso olimpicamente da expresión “stress”, pois para un servidor esa palabra
vencina sempre coa mellor terapia existente: a do traballo. Antigamente, o
sacho, a aixada, o fouciño, a fouce, a gadaña, o carro, o arado, as vacas eran
a mellor terapia para esa “enfermidade”. Agora son a peta, o sacho, a fouce, a
poda, a rodriga, o esterco, o atar, o enramar, o esfollar, a vendima, a viña
toda as auténticas terapias. Botei cinco días practicando terapia, pero
estaba en continua tensión. Por non
escribir. Certo que podía facelo pola noite. Pero chegaba á casa e o único que
quería era estomballarme no sofá e ver unha película. O de ver a película é un
dicir, pois axiña perdía subtítulos e diálogos porque, pouco a pouco, íaseme a
vida. A única razón pola que desexaba rematar coa maldita vendima (á parte do
cansazo) era porque tiña que escribir. Estou escribindo. O que significa outra
terapia máis para vencer o desacougo, a presión.
BALAS CONTRA CANTAZOS
Guerra das bandeiras. Guerra pola secesión. Guerra de Siria.
Guerra de declaracións. Guerra polos refuxiados. Pero ningunha tan esperpéntica
ou tan salvaxe ou tan incomprensible ou tan rabiosa como a de Israel. Pois
resulta que a policía israelí poderá usar balas reais contra os tiradores de
pedras, que, para máis aquel e a maioría das veces, adoitan ser nenos. Balas
contra cantazos. Algo así como usar un fouciño ante un insulto ou como espichar
unha forquita por unha ollada revirada. É dicir, que Israel ten todo o
beneplácito do gardián das democracias, ou sexa, o imperio ianqui.
En Israel ganan as balas, pero, ai!, en Vigo ganaron os
cantazos. Pedras contra balas. Celtiña contra o Barça. O humilde contra o
poderoso. Ó final a Biblia vai ter razón: David venceu a Goliat. E de que
maneira! I, xa sei que Goliat seica non era Goliat; pero aínda non sendo Goliat
non é moco de pavo “encasquetarlle” catro cantazos. En plena fronte! Quen lle
dera eses cantazos ós nenos palestinos.
En Israel ganan as balas, en Vigo as pedras e na vendima
mestúranse as pedras coas balas. As pedras poden ser a camaradería existente
neses días. As balas veñen sendo o cortar as uvas (agachados), o carrexar os
cestos (cos riles a rebentar), o cargar os cestos (cos riles e brazos esgotados)
e o prezo que che van pagar (a dor da impotencia). Tamén se adoita dicir:
traballar para o inglés. Semana de balas contra cantazos.
A GABARDINA DE MONCHO BORRAJO
Hai
nenos inquietos. Hai nenos tímidos. Hai nenos calados. Hai nenos nugalláns e
hai nenos que latrican que nin o demo. Moncho Borrajo era destes últimos. Aínda
hoxe, Moncho Borrajo latrica que nin o demo e á velocidade da luz.
De
neno, cando pasaba os veráns en Baños de Molgas e como todos es demais nenos,
polo xeral, andaban no monte coas vacas ou cavando nos eidos, non lle quedaba
outra que buscar a alguén que o entretivese, que o enredase un pouco… ou que o
escoitase. Recorría a miña nai. Pois aínda que ela tamén era das que andaban
sempre nas leiras (que remedio!), a miúdo dedicábase máis a fochicar na Cortiña, ó lado mesmo do cemiterio.
Moncho Borrajo sabía que era alí onde mellor a podía atopar. E para alá
marchaba, desde a súa casa, na ponte nova, ata o barrio da Igrexa, ata a Aira
de Arriba. Imaxino a miña nai (co que lle gustaban os nenos) mordendo nas
meixelas do Monchiño con todo o cariño do mundo, pero ás veces mordía con tanto
amor, con tanto querer que chegaba a mancar. Imaxino a Moncho Borrajo dálle que
dálle á lingua e a querer saber. E imaxino ós dous rindo a cachón ante as
palabras do cativo. Porque, Moncho Borrajo, de rapaz, seica xa prometía.
A
confianza do humorista, do showman
molgués con miña nai, coa miña familia debíase, por suposto, á confianza
existente entre a Dundina (a nai do Moncho) e a Lola da Amparo (a nai dun
servidor), a maiores do propio parentesco existente entre unha familia e outra. A confianza foi tal que toda aquela roupa que
lle sobraba ou que xa non lle valía ó fillo da Dundina acababa caendo na casa
da Lola. Por sorte ou por desgraza, a miña familia nunca viviu na opulencia,
nin tan sequera na medianía do bo vivir, máis ben na miseria ou na máis
absoluta sinxeleza, e todo caía entón na casa como auga de maio. Imaxinade as
prendas de vestir.
Nunca se me esquecerá
unha gabardina de Moncho que levou o seu uso nos os lombos dos meus irmáns e fíxose
vella sobre o meu ata que non valeu nin para vestir santos, a pobre. “Neno,
colle cobertoira”, berraba a Lola. Eu collía sempre a gabardina de Moncho
Borrajo. Porque me sentaba ben. Porque non era pesada. Porque era bonita. E
porque me cubría.
Como o tempo pasa e
todo cambia, o rapaz que buscaba parola ou que buscaba a quen o escoitase,
converteuse nun chiscar de ollo en todo o que é hoxe. Pero sei que aínda, de
cando en vez, pensa na Lola da Amparo e nas tardes que o entretivo naquel terreo
da Cortiña. Como o tempo pasa e todo
cambia, o contacto, quéirase que non, foise perdendo, pero sábese que a memoria
é o mellor amigo que ten o ser humano.
Coincidín co éxito, co
boom de Moncho en Madrid, máis en
concreto, na sala Cleofás. E foi a partir de aí onde se “reiniciou” de novo o
contacto con el. Lembro que foi dicirlle “son o fillo da Lola da Amparo” para
que me abrise as portas de par en par. Recordo o seu patrocino daquela viaxe ás
Canarias cuns cantos veciños do concello (que, recoñezo, trouxo o seu aquel, a
súa polémica política) para a que preparara un escrito, un relato sobre o
humorista e que, por vergonza, nin me atrevín a ler diante del e de todos nin
me atrevín a darllo, a remitirllo incluso. É igual; o meu cariño teno sempre.
Polo que me gusta como humorista, como pintor e como caricaturista e, por
suposto, polo contacto que mantivo coa miña nai. Só por isto xa merece o meu
respecto. E non falo do que significou para min a súa gabardina porque igual me
emociono.
Café Bran de Ourense.
Luns, 7 de setembro de 2015
viernes, 18 de septiembre de 2015
COMO AUGA DE MAIO… NO VERÁN.
Atoparse
con grandes autoridades nos anos 50 e 60 do século pasado era un asunto de
palabras maiores. Era algo así como agachar a cabeza, saudar e quieto parado!...
non fora o demo. E se tal encontro transcorría nunha vila pequena como Baños de
Molgas, onde a timidez ou, mellor dito, o medo ó poderoso era máis grande, ata
optabas pola acción de dar marcha atrás ou coller por outra carreira (lembremos
que naqueles tempos a maioría das, hoxe, rúas eran carreiras) para evitar o
saúdo e a vergonza. Non obstante, nesa vila termal había un Grande de España ó
que esperabamos como auga de maio nos meses de verán. Dicir Grande de España é
dicir a máxima dignidade da nobreza española na xerarquía nobiliaria. Empezou a
regularse e a establecerse no reinado de Carlos I no século XVI, pero tal
distinción xa se viña usando nos tempos da monarquía visigoda.
Don
José Bernardo Muñoz y Acebal era o 5º Duque de Riánsares e o 5º Marqués de San
Agustín. A verdade é que os dous títulos impresionan. Pero para os veciños de
Baños de Molgas era simplemente… O Duque. E punto. Vivía en Madrid e pasaba
todos os verán na casa das Señoritas, no casco vello da vila molguesa, porque
casara con dona María de las Mercedes Santa Marina y Rodríguez, natural da
vila.
Maoritariamente
as lecturas dos libros históricos lévante polo poderío desas liñaxes, polo
abuso deses personaxes (dereito de pernada, pago en especies, etc.) e polo medo
a ese poderío; mais o trato co Duque de Riánseres, O Duque de Baños de Molgas,
mandaba ó nabo, ó garete todo ese medo, toda esa veneración, toda esa angustia.
Veneración
que, emporiso, si sentiamos realmente polo noso Duque. Porque cando este
chegaba á pequena vila, e xa desde o primeiro día, empezaba co seu ritual: que
non era outro que percorrer as rúas e carreiras na procura de nenos para
darlles caramelos (quen comía caramelos naqueles anos?) e dos homes para
ofrecerlles cigarros e puros. Logo, por enriba, estaba a súa sociabilidade, o
seu trato coa xente, o seu interese polos veciños e algunha que outra broma.
Sempre recordarei a que me gastaba a min: cada ano que me vía dicíame que cada
vez estaba máis gordo (porque cada vez era máis fideo). O día do patrón, San Salvador,
6 de agosto, xa sabiamos que unha das andas do Santo era súa. Normal, daba por
ela 10, 20, 30 mil pesetas. Naqueles tempos! As outras tres collíanas os demais
veciños ó mellor por 100 ou 500 pesetas, algunha ata chegaría ás 1.000; pero
quen alcanzaba ó Duque!
Don
José Bernardo Muñoz y Acebal, O Duque, nacera en Somió (Xixón) o 18 de agosto
de 1923 (algunhas fontes sinalan o 1924) e recibiu os títulos nobiliarios por
medio dun tío. O Ducado polo que é máis coñecido creouse en 1844 (durante a
minoría de idade da raíña Isabel II) pola raíña rexente María Cristina de
Borbón (viúva de Fernando VII). O nome de Riánsares alude ó río Ánsares ou
Riánsares que pasa preto de Tarancón, na provincia de Cuenca, de onde era
orixinario o primeiro Duque. Tivo unha filla que é agora a 6ª Duquesa de
Riánsares. O “noso Duque” faleceu en Madrid o 17 de setembro de 2008. Nunca
esqueceremos os caramelos (de nenos) nin os cigarros e puros (de adultos). Ó
chegar de vacacións ía polas casas saudando á xente e cando marchaba ía polas
casas despedíndose da mesma xente. Grande de España… enorme en Baños de Molgas!
jueves, 17 de septiembre de 2015
MÁIS ALÁ DO MALTRATO ANIMAL
Dáme medo escribir sobre o pobre
Rompesuelas, sobre o touro da Veiga. Porque temo cabrearme e lanzar insultos sen
orden nin xeito. E hoxe en día, insultar a alguén está bastante penado e a
pesar de que teñas toda a razón do mundo. Creo que, neste caso, quen máis quen
menos (exceptuando a eses energúmenos –ui, perdón) e con dous dedos de fronte
sabe que o que acontece en Tordesillas é simple e sinxelamente un asasinato, é
dicir, máis alá do maltrato. E impórtame un carallo que sexa un animal! Un que?
Quen é máis animal?
Os estúpidos defensores (ui,
outro perdón) dese “excelso” acontecemento alegan en defensa propia a famosa tradición.
Por tradición guillotinábase e sempre nos pareceu unha atrocidade. Por
tradición queimábase á xente nas fogueiras e cagabámonos na inquisición e na
lúa inversa. Por tradición, en moitos países, aínda se lapida a moitas mulleres
e exclamamos: que barbaridade!, que bestas!, que animalada!
E o inoperante, inepto e folgazán
(perdón, perdón, perdón) Goberno español non é capaz de tomar cartas no asunto
para prohibir esa barbarie ou para publicar unha lei que diga: “A partir de
agora, para que quede de tradición per secula seculorum, permítese a todo
cidadán aguilloar nos lombos dos defensores desa insultante `festa´ do touro da Veiga”. Eu apuntábame a aferretar,
a aguilloar cunha aguillada ben longa e ben dura neles. E sen perdón nin
hostias.
viernes, 11 de septiembre de 2015
LECCIÓNS DE SOLIDARIEDADE
Hai equipos en case todos os deportes que moitas veces fanse
querer. Por ser demasiado modestos, por ser sufridores, por ser o irmán pobre
da cidade, porque os seus xogadores visten de tal ou cal maneira, etc. Eu
recordo sempre ó Estudantes como o equipo ó que os afeccionados ó baloncesto
lle tiñan máis cariño. Por ser o modestiño de Madrid e por ser o que quizais
máis apoiase á base, ós cativos que empezan. Seguro que por esa pobreza de non poder
fichar grandes xogadores. Creo que foi nos anos 70 e 80 cando mellor estivo,
cando tiña máis fama. Pois ben, o pasado venres lin unha noticia que me fixo
lembrar todo ese cariño que sempre se lle tributou e que, agora, hai que seguir
tributándolle.
Resulta que o Estudantes vai crear unha escola de baloncesto
dirixida principalmente ós nenos refuxiados. Aí está; son detalles que quéirase
ou non fanche brillar os ollos coa emoción ó percorrer as liñas da noticia. E
non só iso; vai incluso algo máis alá: tamén organizará un partido solidario,
que será o da primeira xornada da liga.
Aí, ó pé do canón. Un equipo aínda máis modesto có dos anos citados.
Sempre cos máis necesitados, cos máis desamparados deste mundo. E hai a tira
deles. Un equipiño dándolle leccións de solidariedade ós grandes de España.
Estes van ó negocio. Aquel a mirar para o embigo do ser humano. Grazas,
Estudantes.
jueves, 10 de septiembre de 2015
O SORRISO QUE SEQUE AS BÁGOAS
Bágoas que choutan duns ollos
cansados e apesarados, entristecidos. O medo é libre. A incerteza manca e doe,
fai tremer as entrañas. Impotencia ante o descoñecido. A soidade é o cabalo de
batalla co que hai que cabalgar. Pensas no futuro e asoma unha negrura que,
máis seguro, torne primeiro a gris e logo a branco. Pero antes hai que pasalas negras,
hai que pasalas moradas. Bágoas que bañan a cara. De medo. De impotencia. Agora
son os pensamentos os que bulen por unha vida futura. Medo a non ter futuro.
Mais non queda outra que botar man da esperanza e loitar contra as adversidades
que aniñan nun. Toda loita ten a súa recompensa. Ten que tela. Non queda outra
que confiar. E esperto e durmido tes que pensar e soñar que aquí estás ti, que
nada e que ninguén é quen de conter, de cortar as túas ansias de supervivencia.
Seca as bágoas, deixa caer un sorriso e pensa que máis alá de ti segues estando
ti, e ti, e ti; e logo xa os demais. Agora, deixa que o sorriso seque as
bágoas. Xa verás como o optimismo calma a incerteza.
Suscribirse a:
Entradas (Atom)