Empezo. Un novo caderno. Un agasallo polo aniversario. Un caderno no que caerán feixes de relatos, pingas de orballo, ruxerruxes de feitos, moreas de pensamentos e latexos de sentimentos. Un caderno no que será de día e se fará de noite, no que os soños bailarán ó ritmo do rock and roll de Elvis Presley e asubiarán os spaghetti western de Ennio Morricone.
Neste novo caderno, a luz daralle paso á escuridade; no barullo haberá momentos de silencio, e o silencio durmirá sobre a almofada dos desexos. O lobo ouleará desde un outeiro e a noite pecha será a raíña das palpitacións acompasadas do tempo.
Haberá relatos nucleares e inmaculados, narrativas universais e aldeás, terrícolas e marítimas, labregas e filosóficas. Haberá camiños por escoller e carreiros fixos, con atrancos e sen eles. Haberá paz e sosego, ebulición e excitación; haberá risas, e penas, e pesares, e berros, e bicos, e abrazos.
Neste novo caderno, cada palabra dirá algo, cada frase subirá o ton ou calmará as ansias, cada parágrafo tensará o relato e cada historia pousará todo iso nas páxinas brancas que explicarán toda unha vida. A vida consiste en contar e deixar correr. Por este caderno pasarán vidas.
Xa está practicamente completa a primeira páxina desta estrea, na que se di algo e non se di nada, na que as pingas de orballo caen mansamente coa intención de abrir camiño ó que queda por dicir. Nesta primeira páxina, xa nada máis. Nas seguintes, a tinta azul dos pensamentos marcará os tempos.
Cafetaría La Carabela. A Valenzá. Martes, 7 de abril de 2026
Finca Fierro. Barbadás. Martes, 7 de abril de 2026
No hay comentarios:
Publicar un comentario