MASACRES NUN PAÍS CIVILIZADO

            Estados Unidos é un país civilizado. Estados Unidos é un país rico. Estados Unidos aínda é máis rica e poderosa na industria armamentística. Segundo en Galicia a un neno a primeira palabra que lle ensinan é “carallo”, en Estados Unidos ándanlle no almorzo, no xantar e na cea coa palabra pistola, ou revólver, ou rifle, ou metralleta. Segundo en Galicia un neno soña ou xoga cun aradiño de pau, en Estados Unidos cólganlle a un cativo sobre o varanda da cama un revólver metido nunha cartucheira. Segundo en Galicia a un neno lle ensinas como se fai un carro de vacas cunha cabeza de nabo, en Estados Unidos a un neno lévano a un monte ou simplemente detrás da casa e iníciano na marabillosa arte de apuntar e disparar.

Porque en Estados Unidos todo o mundo ten moitas armas e con licencia para matar. E entre a facilidade que se lles dá co arsenal á man e que a gran maioría queren ser Rambos de película, ó xuntarse esas dúas ecuacións, asoman nun santiamén todas esas masacres polas que, despois si, botan as mans á cabeza. Calquera cativo pode abrir calquera caixón da súa casa e atoparse con todo un arsenal. E ós nenos sempre lles gustou experimentar. Despois, pasa o que pasa, matanzas sen control por todos os Estados ianquis. Algúns inícianse cedo, outros vólvense tolos a unha certa idade. Pero un tolo, se non tivera as armas que ten ó seu alcance, penso que pouco mal podería facer. Cun coitelo non creo que eliminase a 59 persoas e ferise a máis de 500. Un neno non mataría a outro, aínda que fose por erro ou por accidente, se non se atopase con ningunha pistola na súa casa. Así de simple. O que pasa é que, claro, a industria… E precisamente esa industria produce, ocasiona moitos beneficios económicos. Por iso, a min, e sentíndoo moito polas vítimas, non me angustian tanto esas carnicerías porque, creo, eles mesmos as buscan. Podíanse evitar. Pódense evitar. Pero non interesa. Así é que… que carguen eles coa súa conciencia.

            Finca Fierro. Sábado, 7 de outubro de 2017