Vaia por diante que incluso odio
que se coma nos cines, porque os cines son para ver películas e as cociñas ou
comedores das casa son para comer. Pero ante a imposibilidade de que, hoxe en
día, se prohiban eses malditos flocos de millo, eses descomunais botes de
Coca-Cola e esa visión porcalleira das salas ó rematar a película, paso a criticar
á empresa Galicine, a que rexenta os cines Pontevella da nosa cidade, porque
lle prohibiu a unha nena celíaca entrar coas súas larpeiradas sen glute. Antes
da crítica dicir que, ó ler isto, case me alegrei polo que comentaba na
primeira liña, pero resulta que tal prohibición debíase a que as tales lambonadas
non se mercaran nesa pallasada de mostrador que teñen dentro (eles chámanlle as
súas tendas) Non lles chega con que pagues a entrada, senón que tamén queren
aproveitar o que vaias consumir. Odio que se coma nos cines, pero se deixan,
non se pode obrigar a unha persoa a mercar onde non quere. Eu sei de dúas boas
opcións: unha, meterlle un bo paquete polo de libre mercado e, dúas, que só que
fora durante unha semana, que ninguén lle mercara nada en ningunha das “súas
tendas”
martes, 31 de marzo de 2015
lunes, 30 de marzo de 2015
OS SEUS COMPROMISOS
Hai pouco falaba das
inauguracións, ou mellor dito, dos inauguradores; que facían súas as obras que
pagabamos os pombos. Pois nada, non valeu de nada a crítica. Falando claro: nin
puto caso! É máis, acaban atacando ó criticador. Así o fixo Ana Pastor cando o
BNG lle botou en cara que inaugurara tres obras en catro horas. Sen andar con
días santos (díxeno sempre: van de chulos e incluso che refregan nos fociños a
súa chulería) soltou a gran frase, ou sexa, a gran chulería: “Doe que cumpra os
meus compromisos”. Iso é, os compromisos, os de coller pala e carretilla,
ladrillo e bloque para construír a obra con cariño e con moito suor. Para
inaugurar esas tres obras (que pagamos nós) tería que facer uso de
desprazamentos (que pagamos nós) a eses lugares e facéndose acompañar dunha
camándula de ineptos (que, por suposto, pagamos os pombos) e ante as obras
soltar aquilo de: “aí as tedes, grazas ós meus esforzos, ós nosos crebacabezas”.
E queda, e quedan tan panchos! Ata aseguro que, agora, logo da crítica, dunha
ou doutra maneira, haberá que esperar as súas represalias. Seguro que chegan!
Coma se non os coñecese...
sábado, 28 de marzo de 2015
A SÚA DOR RILLA NAS TRIPAS DOS SENTIMENTOS
Chegan tres noticias para quedarme incluso curto este espazo. Xeralmente,
nunhas eleccións todos acaban contentos. Nas andaluzas, non. Por fin algúns
asumiron o fracaso. O PP foi unha hecatombe; IU un fracaso e UPyD desapareceu.
Ata o propio Podemos, con todo o que conseguiu, confiaba en algo máis.
Pola contra, onde se respiraba optimismo foi onde, antes, había amargura
e moitos cabreos, é dicir, no clásico. Case sempre sufría unha gran resaca o
perdedor dese encontro e, tamén xeralmente, por culpa da arbitraxe. Mais por esta
vez e neste caso, os merengues aguantaron ben; porque o seu equipo, aínda que
perdeu, tivo contra as cordas durante unha hora ó que ía de favorito. E hoxe en
día xa é moito pedir, tal como estaba xogando o Real Madrid. Tamén se pode
dicir que tiveron dobre alegría: por esa hora comentada e porque, despois, nos
últimos minutos, non saíron goleados. O clásico… agora si, coma un luns
político: todos contentos.
A amargura, a alegría, a tristeza, os cabreos, os recoñecementos pasan a
segundo plano ante o impacto brutal do accidente do avión alemán nos Alpes
franceses. A cantidade de mortos empurra a un recanto do esquecemento ás
eleccións andaluzas e ó clásico dos clásicos. Non queda outro remedio que
pensar nesas familias rotas. Incluso non podes evitar sufrir con esas familias;
porque as súas imaxes, as súas declaracións, a súa dor rilla nas tripas dos
sentimentos. E eses nenos da idade dos meus; pensas e… pingas de orballo cobren
os ollos.
viernes, 27 de marzo de 2015
PEDRAS CONTRA O SEU TELLADO
Houbo críticas, cabreos e rabia
porque en Mérida estivo a piques de celebrarse un torneo internacional de pádel
no mesmo anfiteatro, que é Patrimonio da Humanidade pola Unesco. E tan só houbo
críticas! O que tivo que haber eran unhas boas labazadas para José Antonio
Monago, o presidente rexional, porque querer permitir tal animalada, tal
esperpento. No anfiteatro de Mérida! Si, oh, moito máis alá das labazadas. Se
el non quere, se o Goberno Central tampouco quere, ten que ser entón o mundo
enteiro (que para iso é Patrimonio da Humanidade) o que poña a ese señor no lugar
que lle corresponde, algo así coma nun cortello. E o moi... (calquera nome
despectivo) rebatía as críticas co achaque de que tamén acolle funcións de
teatro e que ninguén obxecta nada. O pobriño non caeu na conta de que ese
recinto é un teatro, de que foi un teatro moi, pero que moi antigo, pero
teatro. Non entendo como hai mandaríns que van incluso en contra dos seus
intereses, que tiran as pedras contra o seu tellado. Tiña que estar todos os
días a pé de campo para conservar esa xoia, esa autenticidade e non para
destripala a cachos. Menos mal que, ante tanta crítica, recuou. Normal.
miércoles, 25 de marzo de 2015
COMA UN CESTO BARRELEIRO
A nena Pandora Lustre Camiño caeu
coma un cesto barreleiro tan axiña como deixou de apoiarse no cristal da
cafetaría. Pero coma todos os cativos, caeu ben, caeu de cu. Agora os nenos
nunca se mancan nesa parte do corpo. Ata hai que recoñecer que, agora, incluso
dá un chisco de gusto darlle un azoute no cu a un neno; non lles doe. Os cueiros
destes tempos amortecen un azoute e algo máis ca un azoute. Ollo ó dato: uso
azoute con todo o cariño do mundo, como cando miña mordía ós nenos nas meixelas
de tanto que os quería. Eu saio un chisco a ela; non os mordo, pero doulles
unhas apertas tan fortes que teño medo a rompelos. Pero é que onde estea un
neno... Falando de cueiros; imaxino os dos anos 60. Que dis, home, acaso levaba
eu cueiro? Nin cueiro nin farrapo de gaitas! O cu andaría ó aire a maioría das
veces e as outras... as outras, pois iso, con farrapos ou que os calzóns
aguantasen o que lle botasen. E os pantalóns. Ata nos nomes cambiou o asunto;
de calzóns pasaron a slips. Queda máis fino. A nena Pandora Lustre Camiño
ergueu traballosamente pero axiña volveu caer coma un cesto barreleiro. Non lle
quedan caídas!
martes, 24 de marzo de 2015
PARA MATAR O TEMPO
Deixei correr o tempo, pero este
non corría; tan só pasaba. E pasaba lento. Mentira! O tempo nin leva présa, nin
está coa nugalla encima. O tempo só pasa. E quería que pasase rápido, pero nin
caso. Eu tiña ganas de que chegase o asunto. Que asunto? Ah, non sei. Ou si: o
asubío. O que, oh? O asubío. Non entendo nada, compañeiro. É igual, aínda que é
ben fácil: estou esperando a que me asubíe alguén. Para ir. Como? Si, para ir.
Ás veces gústame ser como Humphrey Bogart, mais o peor é que non hai ningunha
Lauren Bacall. Oe, compañeiro, ti estás ben? Si, por que? Porque non sei se non
estarás mesturando o allo co bugallo. Non oh, que va; o que pasa é que eu
enténdome só. Ás veces digo e fago cousas para matar o tempo. Por certo, a que
non sabes cómo se mata o tempo? E logo, sábelo ti? Claro! O tempo mátase
contemplando as moscas, xa sabes, de papamoscas. Outras veces busco e penso nos
biosbardos. Pero estes deben estar perdidos no tempo. Os biosbardos teñen o seu
aquel. Vaia se o teñen! Adeus, compañeiro, eu non te aturo, hoxe dis cousas moi
raras.
sábado, 21 de marzo de 2015
Á META CHÉGASE IGUAL
Por unha banda, doulle toda a razón ós responsables dun restaurante estremeño
cando mesturan a comida co sexo, dous praceres que ascenden ós ceos. Pero por
outra beira, quítolles esa mesma razón cando declaran que unha comida sen viño
é coma o sexo virtual, non é o mesmo. Certo, non é o mesmo; se non bebes viño
tes que beber auga e se non hai nin sexo virtual non che queda outra que mollar
a man. Non bebo viño, mais prometo ante este escrito que con algunhas comidas,
metaforicamente, subo ós ceos, gozo coma se tivera un orgasmo. Chégame con dicir
un bo cocido ou, simplemente, un repoliño. Iso é gloria bendita! Tamén me chega
calquera verdura; un caldiño de grelos, un caldiño de verzas do país ou brancas.
De rapaz non comía a potaxe de chícharos que facía a miña nai nun prato normal;
botábamos nunha bandexa grande… e repetía! Ata o señor Luis de Bouzas, o
carpinteiro, unha vez que nos andaba na casa ó verme comelos, díxolles os meus
pais que podían deixarme ir polo mundo adiante, que era de bo bico. E non digo
nada dunha boa empanada con moita cebola. Acompáñoa con auga. Cada vez que digo
que co polbo bebo auga, algúns engurran o fociño coma se fora un crime. Tamén
aseguro que co cefalópodo tamén xanto coma os anxos. O sexo máis un bo xantar;
deixádeme de lerias con bebidas de tal ou cal clase. O camiño non será o mesmo,
pero á meta (á éxtase) chégase igual.
Suscribirse a:
Entradas (Atom)