SOMOS MÁIS QUE PASMÓNS

              Se te atopas cun titular que di que “os tribunais só fallaron en 2012 oito delitos de corrupción”, non queda outra que botar as mans á cabeza, abrir a boca de asombro e quedar coma un pasmón. Abofé, somos máis que pasmóns! Porque xa nos estamos habituando a tales novas de corrupción. Coma se veramos chover en Galicia. E mirade que estamos acostumados a ver chover na nosa terra! Asumimos a corrupción coma se fose xa unha amiga. Xa nos dá igual que tal ou cal político, que este ou aquel personaxe sexa corrupto; incluso xa é máis fácil analizar, estudar, citar a aqueles que non están corrompidos. Ata penso que chegan os dedos das mans para contalos. Temos tan asumido o da corrupción que mesmo nos parece ben que o noso presidente Feijoo lle pida moderación nos gastos aos reitores das Universidades… quitarlle á educación para “solidarizarse” cos corruptos. Non pasa nada; a vida segue. Pasmóns!

              Biblioteca da Valenzá. Venres, 14 de xuño de 2013