Hai fotos que doen ó
contemplalas. En plena crise, e canto chupatinta! Inauguración do novo edificio
xudicial de Ourense. Un edificio que, se entende, é necesario e que se fixo
para traballar nel, e punto. Pero antes había que ostentar a gran obra. Coma se
fosen eles os que a pagasen. E a foto, sacada desde unha certa altura, amosaba
unha sala chea de “obreiros” ós que os pombos lles pagamos o soldo por,
precisamente, poñer o careto. E con iso xa cumpriron, xa foron os benditos culpables
de que, hoxe, Ourense teña un edificio de seu. Toda esa camándula cobra polo
esforzo de achegarse ata alí. En pleno crise seguimos sendo o país máis rico do
mundo. Pagamos o edificio e pagamos a inauguración. Inaugurar só inaugura un,
pero pagar pagámoslle a un cento (ó que leva a tesoira, ó que suxeita a cinta,
ó que descobre a placa, ó que sinala co dedo o que di a placa...) Si, imaxino
que os ourensáns estaremos contentos por un edificio que, efectivamente, era
necesario. Pero a foto... a foto ofende de carallo. Por que non se inaugurou de
noite?, ou en silencio?, ou sen prensa? Ah non, iso si que non; a xente ten que
ver que nós tamén puxemos o graniño de area. Certo; o careto.
No hay comentarios:
Publicar un comentario