Mido a distancia por se teño que
fuxir. Así, a ollo, pouco máis de 50 metros. Estou a piques de roubar unha roda
de muíño. Pesa de carallo. Mais confío en poñela de pé e que bote a rodar. “Rodar
y rodar. Rodar y rodar. Después me dijo un arriero que no hay que llegar
primero, pero hay que saber llegar”. Perdón, perdín un chisco o goberno. Pero
que pasará se roda para abaixo? Para arriba xa sei que non podo con ela. Aínda
así imos intentar poñela de pé. Vánseme as forzas pensando en se teño que
fuxir. 50 metros son poucos, pero non teño as pernas dos 20 anos. Fago un
pequeno esforzo e véxoo complicado. A roda de muíño pesa de raio. Ou de
carallo, que máis ou menos é o mesmo. Fago outro esforzo. Xemo. Súo. Póñolle
moito nervio. Nin tan sequera consigo movela unha milésima do chan. E se me
pillan? Pero non todos os días se rouba unha roda de muíño. Tenso os músculos.
Aperto o cu. E berro. Ondiá, teño a pedra de pé! Non o creo. Mentres miro para
un lado polo medo de que me pillen, a pedra empeza a rodar. Non consigo detela.
E co traballiño que me deu.
No hay comentarios:
Publicar un comentario