Coma se fósemos xunguidos da man. Os políticos de dous
partidos de Baños de Molgas e un servidor. Os políticos do BNG e do PSdeG
porque seica esperaron ata o último suspiro ou, como dixo este xornal, ata o
tempo de desconto para chegar a un acordo e así arrebatarlle a alcaldía ó PP. E
un servidor porque tamén esperou ata a prórroga (os venres adoito escribir o
relato e deixo de prórroga os sábados) para comunicar por medio destas liñas o
gozo que o embarga.
A ver, o de Baños de Molgas foi unha auténtica machada que
nin os máis optimistas esperabamos, polo que imaxino a alegría e o orgullo dos
vencedores. Pero o meu gozo aínda ten máis mérito porque tamén, en Barbadás,
onde vivo, houbo outro cambio máis que desexado. Como se adoita dicir: dous
paxaros (ou máis) dun tiro. Quen pode pedir máis!
A Baños de Molgas hai moitos anos que tivo que chegar o
cambio, porque sendo como é unha vila onde se dá todo, absolutamente todo para
ser moitísimo máis do que é, estivo sempre metida nun pozo sen fondo por culpa
da incompetencia, do deixamento, da neglixencia e da nugalla dos que a
gobernaron. Non sei se con este novo equipo iniciará o rexurdimento, a resurrección,
pero o que si sei seguro é que a peor non pode ir. Intúo que si haberá cambios
a mellor, tanto en Baños de Molgas como en Barbadás. Merecen ter máis do que
teñen.
No hay comentarios:
Publicar un comentario