A semana pasada foi desas nas que me quedei sen temas para
este recuncho, nas que me quedei completamente en branco. Entre que non lin os
xornais con profundidade (por culpa do intenso traballo que tiven), entre que
rematou o fútbol (que sempre é un asunto do que escribo e me gusta escribir) e
entre que a política tan só nos deu os raquíticos cambios de Mariano Rajoy no PP
(é verdade, a min que me importa!), digo que entre todo iso a miña cabeciña non
deu para máis.
Lembro que un día me dixo o director deste xornal que
admiraba a aquelas persoas que cumprían, practicamente a diario, coa obriga de
encher aínda que só fose un recantiño dos xornais, que é moi complicado
escribir algo todos os días. Eu, interiormente, case me burlo del porque pensaba nas miñas catro trapalladas
que escribo e que, para máis aquel, adoitan ser curtas (se exceptuamos a
columna do cine). Emporiso, algunhas veces, penso se Sechu Pastoriza non tería
razón; pois aínda que sexan trapalladas hai que pensar nelas e escribilas. Ás
veces non che apetece. Outras non sabes que dicir. E unhas poucas non tes tempo
ou estás para o arrastre. Pero as Pingas de Orballo están aí, os Recunchos
Hebdomadarios chegan os luns e a Fábrica de Soños espera os sábados. Si, son un
home moi ocupado. Quizais con esperpentos, pero tamén os escribiu Valle-Inclán.
Vai por ti, Sechu; e por eses que teñen que cumprir sempre… que non é moco de
pavo.
No hay comentarios:
Publicar un comentario