O TINO DA EUDOSIA

              Ás veces Constantino Losada Santurce quedaba pasmado mirando as matrículas dos coches. E os catro números quedábanselle na cabeza ao momento. Non así as letras. Porque non se fixaba nelas. Nos números si, e á segunda vez que os vía xa sabía de quen era tal ou cal coche. Constantino Losada Santurce era máis coñecido por Tino. Tino, o fillo da Eudosia do Caramés, a irmá de Lucía a Lagarta, que casara en Escornabois de Abaixo. En Escornabois de Arriba vivía outra irmá de Eudosia, ou sexa, tía de Tino. Pero non se falaban. Precisamente por culpa de Tino; porque a súa tía, a Luísa do Grilo, latricou coas poucas luces de Constantino Losada Santurce. Isto, a Eudosia, sentoulle mal. Normal. Era seu fillo. Tino anota outra matrícula no pensamento e segue pasmado.

              Cafetaría Os Carrís da Valenzá. Venres, 17 de agosto de 2012