Politicamente,
unha das noticias que máis destacou da semana pasada foi o éxito da folga que
se levou a cabo o xoves sobre a educación. Se falamos deportivamente, está a
guerra interna do Real Madrid, comandada polo capitán xeneral Mourinho e a
conquista da liga do Barça. Se nos remitimos á cultura, destaca por triste a
nova do falecemento dun dos mellores actores que deu a cinematografía nacional,
don Alfredo Landa, que, para un servidor, deixou un personaxe inesquecible, o
bandido e atracador Fendetestas, que
cando quixo atracar unha casa, axudoulle a parir a unha vaca. Pero eu hoxe teño
que falar dunha nova laboral que me concirne: que, por fin, rematei coas
subvencións a agricultores e gandeiros, máis coñecida pola PAC (Política
Agraria Común). Durante tres meses deixei os ollos ante a pantalla dun
ordenador metendo leiras e máis leiras de raquíticas áreas para completar
expedientes de ducias de hectáreas. O venres, derradeiro día do prazo, rematei
ás dez e media da noite!; pensei de que tiña que durmir diante do ordenador. As
nádegas xa levaban tempo durmidas de estar tanto tempo sentadas e a cabeza
semellaba o zunido dun abesouro logo de bailar ante áreas e centiáreas e ante
fotos de leiras amosadas polo Sixpac.
Finca
Fierro. Domingo, 12 de maio de 2013
No hay comentarios:
Publicar un comentario