Unha
punzada de dor atravesa os cadrís de Xurxo Chamán Soltero. Non sabe se é a
causa do lumbago ou porque botou todo o día sachando nas patacas que ten na
leira da Pedradarca, do Cantinflas. Ao mellor xuntóuselle todo. Ao mellor ata
puido coller unha mala postura na cama. O caso é que, ás veces, dóelle abondo.
Tanto que, ao andar, semella que coxea, e cando fai algún movemento estraño é
cando esas punzadas asoman. Neste caso, a súa cara cambia de expresión e
algunha que outra vez algún laio tamén sae da súa boca. Cando está ben, axiña
aparecen na súa mente as típicas bromas sobre o seu segundo apelido; que se
está solteiro. Mira que hai xente retorcida e interesada. Emporiso, nunca
deixou a ninguén sen resposta dicíndolles que levaba anos casado. Pero aquilo
de comprar o apelido co estado civil é algo que xa o incomoda moito. Unha nova
picada de dor bótalle por terra o pensamento da broma.
Cafetaría
Menfis de Ourense. Xoves, 23 de maio de 2013
No hay comentarios:
Publicar un comentario