Acabo de ler o libro galego “As
rulas de Bakunin” (2000), de Antón Riveiro Coello. E lino case nun suspiro
porque a emoción enchíame o peito en cada capítulo seu. Intenso e cuns
personaxes de luxo. Foron 253 páxinas de auténtico goce. Que marabilla de novela!
Espero ter o mesmo goce co seguinte libro deste autor: “Acordes náufragos”, que
imaxino que empezarei a ler pola tarde.
CONTRAPORTADA:
Nesta extraordinaria novela,
Riveiro Coello percorre o noso século (o agrarismo, a República, a Guerra, a
represión, a emigración, a democracia) da man dun militante anarquista que
funde a súa historia particular coa colectiva. Intensa e emotiva, “As rulas de
Bakunin” é unha chamada á recuperación dunha memoria histórica que é amarga e
gozosa, nobre e tráxica.
SOLAPA
DA PORTADA:
Antón Riveiro Coello (Xinzo de
Limia, 1964) cursou estudos de Dereito na Universidade de Santiago e
actualmente traballa na administración autonómica. Riveiro Coello é un dos
narradores máis destacados e premiados da literatura galega na pasada década.
Publicou as novelas “Valquiria” (1993, premio Camilo José Cela), “A historia de
Chicho Antela” (1997), “A quinta de Saler” (1999), coa que foi finalista do
premio Torrente Ballester, así como as recompilacións de relatos “Parque
Central” (1996) e “Airadas de palabras” (1998), onde se recollen os contos que
lle foron premiados nos certames Manuel Murguía e Modesto R. Figueiredo entre
os anos 1991 e 1997. No ano 2000, Riveiro Coello publicou “Animalia” (premio
Café Dublín) e as novelas “Homónima” (premio Álvaro Cunqueiro) e “As rulas de
Bakunin” (premio García Barros).
No hay comentarios:
Publicar un comentario