Quítame esa palla que me está
molestando no pescozo. E Harún Camiño Riotorto quitoulla cun sopapo que case
mandou ó chan a Idacio Bispo Galego. Os dous estaban discutindo sobre as voltas
que daba unha pelota sobre o dedo índice ou furabolos dun xogador de
baloncesto. Harún dicía unha cantidade e Idacio rosmáballe con que esas voltas
eran sobre o dedo medio ou pai de todos. E que terá que ver un dedo ou o
outro!, exclamaba Harún. Ai, amigo, e non vai ter que ver; o dedo medio é máis
gordo có outro e iso nótase, machiño. O de machiño alterou a Harún Camiño, polo
que a discusión foi a máis. Eran amigos e semella que quixeron volver á nenez
co asunto da palla (a ver se es capaz de quitarme esta palla!) Sucedeu o
explicado xa; que Idacio Bispo case se viu escarranchado pola zafranada do seu
amigo. Tiveron que intervir con urxencia os demais clientes do bar para que a
cousa non fose a maiores. Ó final foi o propio dono do local o que os botou
fóra cun “idea bailar a mona a outro lado”, ou sexa, á carreira. Saíron cambaleándose.
Café Oren Express da Valenzá.
Luns, 10 de febreiro de 2014
No hay comentarios:
Publicar un comentario